ကိုယ်သန်ရာမှအလှဆင်ခြင်း

Share

ကိုယ်သန်ရာမှအလှဆင်ခြင်း

လူအများသည် ကျွမ်းကျင်ရာ လိမ္မာကြသည်။ ကိုယ်သန်ရာသန်ရာကိုယ် အလှဆင်ကြသည်။ Stable (2)ကိုယ်မကျွမ်းသော်လည်း ကျွမ်းသောပုဂ္ဂိုလ်များ ရှိကြသည်။ ကျွမ်းသောပုဂ္ဂိုလ်များသည် ကျွမ်းကျင် နိုင်နင်းသော ကဏ္ဍများ အကျိုးဆောင်ကြသည်။

မိမိမှာတော့မူ လေ့လာခဲ့ရသဖြင့် ပဋိပတ္တိပိုင်းမှ အလှဆင်လိုပါသည်။ အများသူငါလည်း သိကြပါသည် – လောကုတ္တရာလိုက်လျှင်တော့မူ လက်တွေ့ကျင့်ကြံ အားထုတ်အလုပ်လုပ် နှလုံးသွင်း မှသာလျှင် အောင်မြင်မှု ရနိုင်လိမ့်မည်ဟု ယုံကြည်ကြပါသည်။

အမှန်အကန်လည်း ဖြစ်ပါသည်။ လက်တွေ့ကျင့်သောအခါ ထူခြားသော အတွေ့အကြုံများကို ရရှိနိုင်သည်။ စာရေးသူလည်း လက်တွေ့ကျင့်ကြံခဲ့သဖြင့် ဆရာသမားကို လွန်စွာကျေးဇူး ဦးခိုက်တင်မိပေသည်။ ကျွမ်းကျင်နိုင်နင်းသော အပိုင်းများ၌ ကျွမ်းကျင်နိုင်နင်းစွာ ဗဟုသုတရရှိခဲ့သည်။ ထိုဗဟုသုတများကိုလည်း အခါအားလျော်စွာ ရေးသွားပါမည်။

တရားရလိုလျှင်တော့မူ ကိုယ့်ခန္ဓာကိုယ်ကို ရှုရမည်သာဖြစ်သည်။ ရှုရမည်ဆိုသည်ကို အနုစိပ်ပြောရမည် ဆိုပါက – ကိုယ့်ခန္ဓာ၏ အပျက်ကို ရှုရမည်ဖြစ်သည်။ ဤနေရာ၌ ရှုရမည်ဆိုသည်ကို သဘောပေါက်ရမည်။ ကြည်နေ၍တော့ မရချေ – ကြည့်ရုံသက်သက်နှင့်ကတော့မူ အဝိဇ္ဇာဥခွံ ကွဲမှာလည်း မဟုတ်ချေ။ အနမတဂ္ဃ သံသရာက အဝိဇ္ဇာနှင့်တဏှာ အလွှမ်းမိုးခံခဲ့ရသော ဤရုပ်နာမ်သည် – ယခုအခါ၌လည်း အဝိဇ္ဇာနှင့် တဏှာက လွှမ်းမိုးလျှက် ရှိနေမည်သာ ဖြစ်သည်။ ရှုနိုင်မှ တော်ကာကျမည်၊ မရှုသေးဘဲနှင့် ကြည့်နေလျှင်တော့မူ အဝိဇ္ဇာအကာကြီးကိုသာ တွေ့မြင်ရပေလိမ့်မည်။

ရှုလိုက်မှ ပျက်မည် — ထို့ကြောင့် အပျက်မြင် မဂ္ဂင်ဆိုသော စကားလည်းရှိသည်။ အပျက်မမြင်သေးသမျှ စိတ်မချရချေ။ တနည်းအားဖြင့် အပျက်မမြင်လျှင် ဝိပဿနာ စခန်းရယ်လို့ သတ်မှတ်နိုင်ခွင့် မရှိပေ– သမထများသည် အဖြစ်ကြည့်ကြသည်။  သို့သော် သမထကျင့်စဉ် ဆိုသည်မှာလည်း လွယ်ကူသော ကိစ္စတော့မူ မဟုတ်ပါချေ။

မိမိကတော့မူ ဝိပဿနာသမားဖြစ်၍ ဝိပဿနာအကြောင်း အဓိကထား၍ ရေးလိုပါသည် — ဝိပဿနာ၌ အပျက်ရှုရမည်။  အပျက်ရှုသောအခါ မိမိခန္ဓာကိုယ်ကိုပင်လျှင် အပျက်ရှုရမည်။ တပါးသော ခန္ဓာကိုယ်များကို သွား၍ အပျက်ရှုရန်မဟုတ်ဘဲ မိမိခန္ဓာကိုယ်၏ ပျက်နေသော သဘောများအား မြင်ရန်ရှုရမည်။ ရှုမှသာမြင်မည်၊ မြင်မှသာ မုန်းနိုင် ဆုံးနိုင်ပေလိမ့်မည်။

ထို့ကြောင့် အပျက်ကို ရှုရမည်ဟူ၍ ဆုံးဖြတ်ချက်ချရပါလိမ့်မည်။ ဤကား သတင်းပေးခြင်း ဖြစ်ပါသည်။  ဝိပဿနာ အမှန်ကျင့်ကြံ အားထုတ် အလုပ်လုပ်လိုသော ပုဂ္ဂိုလ်များသည် ကိုယ့်ခန္ဓာ၌ အပျက်ရှုရန်သာ လိုရင်းဖြစ်ကြောင်း သတင်းကောင်း ပေးအပ်ပါသည်။

 

ဗုဒ္ဓစာပေဆုရ

ဒေါက်တာချစ်ငယ်(ဒဿန)

 

This entry was posted in Buddhism and tagged , , , . Bookmark the permalink.

Leave a Reply

Your email address will not be published. Required fields are marked *