သိကြားဟစ်ဘုရား၌တရားအားထုတ်ခြင်း

Share

သိကြားဟစ်ဘုရား၌တရားအားထုတ်ခြင်း

စာရေးသူတို့သည် ညအချိန် ဘုရားအမှတ် (၂၄၉) သိကြားဟစ်ဘုရား၌ တရားထိုင်ဖြစ်ကြသည်။ ကွမ်းထမ်းမင်းရာဇာ စေတီဝန်းကျင်တွင် သိကြားပုန်း၊ သိကြားဟစ် စသည်ဖြင့် စေတီများ အုပ်စုလိုက်ကဲ့သို့ တည်ထားလျှက် ရှိသည်။ ညအချိန် မီးမရှိသဖြင့် ကားမှ မီးနှင့်၎င်း၊ Auto-Lamp -အော်တိုလန့်(မ်) ကလေးများနှင့်လည်းကောင်း တရားထိုင်ကြသည်။ တရားထိုင်ရသည်မှာ ကောင်းပါသည်။ အမှန်တော့မူ အာရုံ၏ ကျွန်မခံရန် ကြိုးစားရခြင်း ဖြစ်ပေလိမ့်မည်။

စာရေးသူတို့သည် မြတ်စွာဘုရားကို ရုပ်နာမ်နှစ်ပါး ခန္ဓာငါးပါးလှူ၍၊ ဦးထိပ်ထား ဦးထိပ်ထား၍ တရားရှုကြပါသည်။

စာရေးသူတို့သည် တရားရှုဖန်များသောအခါ တော်တော်အဆင်ပြေသည်ကို သတင်းပေးရမည် ဖြစ်သည်။ ယင်းမှာ တစ်နေကုန် တစ်နေခန်း တရားက လွှမ်မိုးနေကဲ့သို့ ဖြစ်သည်။ စာရေးသူသည် တရားရှုသက် တော်တော်ရင့်ကျက်လာပါသည်။ သို့သော် ပုဂံဘုရားများ၌ တရားထိုင်သောအခါ

၁) Serious စီးရီးယက်(စ်) ဖြစ်ရခြင်း အလေးအနက်ပြုရခြင်း

၂) ညအချိန် ဂရုတစ်စိုက် ကရိကထများစွာ သွားရခြင်း

၃) အားထုတ်သောအခါ ပတ်ဝန်းကျင်၏ (Frequency) ဖရီကွန်စီခေါ်သော လှိုင်းဂယက်များ ထိမ်းသိမ်းစောင့်ရှောက်ရင်း တိုက်ခိုက် ရှုသတ်ရခြင်း စသော ကုသိုလ်များဖြင့် လေးလေးနက်နက် ရှုရသော အပိုင်းများ ပါလျှက်ရှိရာ တရား၌ အင်အား ကောင်းလာသည်ဟု ၀န်ခံရပေလိမ့်မည်။

စာရေးသူသည် နေရာအမျုိးမျိုး၌ တရားထိုင်ခဲ့ဖူးကြောင်း အစီရင်ခံဖူးပါသည်။ သုဿာန်များ၊ ဂူများ၊ ရှားပါးသောနေရာများ၊ လူနေနည်းသောနေရာများ၊ တောများ၊ တောင်များ စသည်ဖြင့် အားထုတ်ခဲ့ဖူးရာ အတွေ့အကြုံ မြောက်များစွာရသည်။

ယခုအခါ ပုဂံမြို့ရှိဘုရားများ၌ တရားအားထုတ်သောအခါ အလေးအနက်ပြုရသည် ဖြစ်သောကြောင့် ဖြစ်ပေလိမ့်မည်။ တရားများ တိုးတက်သည်၊ သမာဓိများ ရင့်ကျက်သည်ဟု  ဆိုရမည်။ ဉာဏ်ပညာများမှာမူ အထူး ကိန်းဝပ်လျှက်ရှိရာ ဆင်ခြင်ဝင်စားတိုင်း အင်အားရှိနေသည်၊ ပြည့်ဝနေသည်ကို ခံစားမိသည်။ အာရုံ၏ ကျွန်ခံဖို့ဆိုသည်မှာ မေ့လျှော့ပေါ့တန်စွာ နေမှသာလျှင် ဖြစ်နိုင်သည်။

အာရုံ၏အရှင်သခင် မင်းဖြစ်ရန်မှာမူကား တရားကို အလေးအနက် ၀င်စား၍ ရှုသတ်ပွားများသောအခါ အောင်မြင်လျှင် မင်းဖြစ်သည်။ ကျင့်ခြင်းသည် လွန်စွာ အဖိုးတန်ကြောင်းကို ကိုယ်တိုင်ကိုယ်ကျ ကျင့်ကြည့်သောအခါ ကောင်းစွာသိသည်။

အချို့သော ကမ္ဘာ့ပညာရှင်များက ဗုဒ္ဓဘာသာကို ပုံပြင်ဟု စွပ်စွဲရာ ယင်းကိစ္စမှာ မှားယွင်းနေကြာင်းကို မိမိ ကောင်းစွာ နားလည်သည်။ သူတို့၏ဖော်ပြချက်မှာ ဘာသာရေးဟူသည် လက်တွေ့ ကျင့်ကြံအားထုတ်မှု မပါ၊ အသိပညာဉာဏ် အမှန်အကန်လည်း မပေး၊ ကိုယ်ကျင့်တရားအတွက် ကောင်းနိုးရာရာ ပုံပြင်ဆန်ဆန် လုပ်ကြံထားသော ဇာတ်လမ်းများ ဖြစ်သည်ဟူ၍သာ သတ်မှတ်ကြသည်။

ယင်းကိစ္စမှာ မှားယွင်းနေပါသည်၊ တစ်ကမ္ဘာလုံး မှားယွင်းနေပါသည်။ ဗုဒ္ဓဘာသာသည် ထိုသို့မဟုတ်ပါ။ ဗုဒ္ဓဘာသာ၌ လေ့ကျင့်ရခြင်းရှိသည်။ ဗုဒ္ဓဘာသာ၌ လေ့ကျင့်သဖြင့် ပဋိပတ္တိပညာဉာဏ် ထိုးထွင်းသိမြင်မှုများ ရရှိနိုင်သည်။ ကိုယ်တိုင်ကိုယ်ကျ ကျင့်သောအခါ ကိုယ်တိုယ် ကိုယ်ကျတွေ့မည် ဖြစ်သည်။

ကမ္ဘာမှာမူ ကိုယ်တိုင်ကိုယ်ကျ မကျင့်ပဲ ရမ်းသမ်း၍ နှိမ်သကဲ့သို့သော်၎င်း၊ စောလျှင်စွာ ယေဘုယျပြုခြင်း (Hasty Generalization) ပြု၍သော်လည်းကောင်း မှားယွင်းသော ဆင်ခြင်ခြင်းများကို လုပ်ကိုင် ဆောင်ရွက်လျှက် ကောက်ချက်ချသည်မှာ ကမ္ဘာ၏ အားနည်းချက်ပင် ဖြစ်သည်။

အမှန်မှာမူ မြတ်စွာဘုရား၏ သာသနာတော်၌ ပဋိပတ္တိဟူသော အခန်းကဏ္ဍသည် လွန်စွာအရေးပါသည်။ အကျင့်အကြံများလည်း ရှိသည်၊ ကျင့်သဖြင့် သိသည်များလည်း ရှိသည်။ အာရုံအား အနိစ္စရှုသဖြင့် အာရုံများ ကြည်သွားသော်၊ အကြွေးများ ရှင်းသွားသော် ရှင်းနိုင်အောင် ရှုလိုက်သောဉာဏ်သည် ကြည်လင်တောက်ပ သဖြင့် ဉာဏ်ပညာကို ဖြစ်စေသည်။

ဤအကြောင်းကို တရားမကျင့်ဖူးသော ကမ္ဘာသည် မသိပါ။ ထို့ကြောင့် ကမ္ဘာအတွက်သော်လည်းကောင်း အမှန်အကန် သတင်းပေးရမည်ဆိုလျှင် ဗုဒ္ဓဘာသာ၌ အကျင့်ရှိကြောင်းနှင့် ဗုဒ္ဓဘာသာသည် အသိဉာဏ်ပညာ ထိုးထွင်း ဆင်ခြင်မှု ပေးကြောင်းကို ဖွင့်ဆိုလိုပါသည်။ ကိုယ်တိုင်ကိုယ်ကျလည်း သက်သေ သာဓကအဖြစ် ရပ်တည်နိုင် ပါသည်။ ဉာဏ်ပညာဦးစီးနိုင်သော အခွင့်အရေးသည် ပဋိပတ္တိသာသနာမှ ရရှိနိုင်သည်ဖြစ်ရာ မကျင့်ဖူးသော ဗုဒ္ဓသာသနာအကျင့်ဖြင့် မတည်သော ကမ္ဘာသည် ဤကိစ္စ၌ ခေတ်နောက်ကျနေသည်။

မိမိတို့သည် အဆင့်မြင့်၍ လူ့ဖြစ်ကျိုးနပ်အောင် စွမ်းဆောင်နိုင်မည် ဖြစ်ကြောင်း ကောင်းစွာ သဘောပေါက် ခံယူမိသည်။ တရားသည် ကျင့်လျှင် ကျင့်သလောက် တိုးတက်သည် ဆိုသည်မှာ ကိုယ်တိုင်ကျင့်ကြည့်၍ ကိုယ်တိုင် သိထားပြီး ဖြစ်သည်။ ဤကိစ္စမှာ အမှန်အကန်ကြီးဖြစ်၍ မငြင်းသာ မတတ်သာအောင် သာဓကအဖြစ် ထင်ရှားလျှက်ရှိကြောင်းကို တွေ့ရသည်။

စာရေးသူတို့သည် သိကြားဟစ်ဘုရား၌ တရားအားထုတ်ရင်း ပတ်ဝန်းကျင် အခြေအနေများကို အမျှမေတ္တာ ပေးဝေမိပါသည်။ အစဉ်အလာအားဖြင့် အင်မတန် ကြီးမားသော ပုဂံမြို့၌ ထူးခြားသော စေတီတော် ပုထိုးတော်များရှိရာ ကွမ်းထမ်းမင်းရာဇာဘုရား အနီး၌ သိကြားပုန်း၊ သိကြားဟစ် တို့သည်လည်း သမိုင်းတွင် ထင်ရှားသော စေတီများ၊ ဖြစ်ရပ်ဆန်းများ ဖြစ်ပေါ်ခဲ့သော နေရာထူး၊ နေရာမြတ် ဖြစ်ရာ ပုဂံ၏ အနှစ်သာရပိုင်းပါသော ဌာနကောင်း ၊ ဌာနမွန်များအဖြစ် ခံယူရင်း တရားကို အောင်မြင်စွာ ရှုခဲ့မိပါတော့သည်။

ဗုဒ္ဓစာပေဆုရ

ဒေါက်တာချစ်ငယ်(ဒဿန)

 

This entry was posted in Buddhism and tagged , , , , . Bookmark the permalink.

Leave a Reply

Your email address will not be published. Required fields are marked *