စိမ်းညက်ညီအစ်မဘုရား၌တတိယအကြိမ်တရားအားထုတ်ခြင်း

Share

ပုဂံမြို့ရှိဘုရားများ၌ တရားအားထုတ်စဉ် အတွေ့အကြုံများ

စိမ်းညက်ညီအစ်မဘုရား၌တတိယအကြိမ်တရားအားထုတ်ခြင်အဆက် —

စိမ်းညက်ညီအစ်မ ဘုရား၌ တရားထိုင်ခြင်းဆိုင်ရာ အတွေ့အကြုံ ဆောင်းပါးကို ဆက်လက် ဖော်ပြမည် ဖြစ်ပါသည်။

တိတ်ဆိတ်သော နေရာကို နေလို့ကောင်းသည်ဟု တရားသမားများက မပြောအပ်ဟု ပညတ်ချက် ရှိသည် ဆိုသည်မှာ တိတ်ဆိတ်သောနေရာ၌ ပျော်ခြင်းသည် သူတော်ကောင်းတို့၏ စရိုက်ဖြစ်၍ မိမိကို သူတော်ကောင်းထင်ရန် ပြောဟောသော သဘောဖြစ်မည်ကို စိုး၍ ပညတ်ခဲ့ခြင်း ဖြစ်သည်ဟု မိမိနားလည် သည်။ တိတ်ဆိတ်ခြင်းကို ရိုးရိုးသားသားကြိုက်လျှင် ကြိုက်မိသည်ဟု ပြောသည်မှာ သဘာဝကျပေလိမ့်မည်။ သို့သော် မိမိသည် လူဝတ်ကြောင်ဖြစ်၍ လွတ်လွတ်လပ်လပ် ပြောနိုင်သည်။

ညအချိန် ကြယ်များကို ကြည့်ရင်း တိတ်တိတ်ဆိတ်ဆိတ် လေငြင်းခံကာ တရားဘာဝနာများ စီးဖြန်းခြင်း၊ ဆွေးနွေးခြင်း၊ ကျင့်သုံးခြင်း၊ ဆောက်တည်ခြင်း၌ ငြိမ်းချမ်းမှုနှင့် အေးမြမှုကို ရသည်ဖြစ်ရာ ကောင်းသည် ကြိုက်သည်ဟု ပြောရပေလိမ့်မည်။ ဤသို့ ပြောခြင်းသည် မိမိအား အထင်ကြီးစေလိုသော သဘောကြောင့် ပြောခြင်း မဟုတ်ချေ။ ကြိုက်သည်ကို ကြိုက်သောကြောင့် ကြိုက်သည်ဟု ပြောခြင်းဖြစ်သည်။ အေးချမ်းသည်ကို မည်သူ မကြိုက်ဘဲ နေပါမည်နည်း၊ အေးချမ်းမှုသည် အရေးကြီးသည် မဟုတ်ပါလော။

မိမိသည် လွန်စွာ ပူလောင်စရာရှိသော ပတ်ဝန်းကျင်၌ပင် အေးအေးချမ်းချမ်း နေခဲ့ဖူးသည်။ ရေးသားခဲ့ဖူးပါသည်၊ ကြံတောသင်္ချိုင်း၌ တရားအားထုတ်စဉ် အနှောင့်အယှက်များတွေ့၍ နောက်ဆုံး အနှောင့်အယှက်များကို အောင်နိုင်ကာ ကြံတောဗိုလ် စွဲခဲ့သည်ဟု ရေးခဲ့ဖူးသည်။ ပြန်လည်ဆင်ခြင် ကြည့်သောအခါ မိမိသည် ကြံတောဗိုလ်သာမက သင်္ချိုင်းအားလုံး၏ ဗိုလ်ဖြစ်နသည်ဟု ကောက်ချက်ချမိ သည်။ အဘယ့်ကြောင့်ဆိုသော် မိမိတစ်ဦးတည်းသာလျှင် သင်္ချိုင်းများတွင် စွတ်ရွတ်၍ တရားထိုင်ခဲ့ခြင်း၊ အတွေ့အကြုံများကို ဖောက်သည်ချခြင်း၊ ရဲရဲရင့်ရင့် ကျင့်ကြံ အားထုတ်ခဲ့ခြင်း၊ အားထုတ်ခဲ့ခြင်းကြောင့် သီလ၊ သမာဓိ၊ ပညာများ တိုးတက်ခြင်းများကို  တိတိကျကျ ပွင့်ပွင့်လင်းလင်း စာတစ်စောင် ပေတစ်ဖွဲ့ဖြင့် တင်ပြခဲ့သည်။

ထို့ကြောင့် မှန်ရာ ကန်ရာကို တင်ပြသော ဤခေတ်တွင် မိမိသည်လည်း အမှန်သမား တစ်ယောက် အနေနှင့် မှန်ရာကန်ရာ တင်ပြရဲရန် လိုအပ်ပေလိမ့်မည်၊ ထို့ကြောင့်လည်း တင်ပြနေခြင်း ဖြစ်သည်။ ဤခေတ်ကြီးသည် တိုးတက်လာသည်ဖြစ်၍ များစွာဝမ်းသာသည်။ တိုင်းပြည်ကြီးသည် တိုးတက်သည်၊ အမှန်အကန်ကို ထုတ်ဖော်သည်။ စာရေးသူတို့သည် ကိုယ်မှန်ကန်သော ရှုဒေါင့်မှ ကိုယ်ကျင့်သော အကြောင်းအရာများအား မှန်မှန်ကန်ကန် ရဲရဲရင့်ရင့် တင်ပြခဲ့သည်မှာ တာဝန်ကျေရန် ဖြစ်သည်ဟု သဘောပေါက်သည်။ ထို့ကြောင့် ငြိမ်းချမ်းသော ဒီလိုညချမ်းမျိုးအား ငြိမ်းချမ်းသည်ဟု ခံယူမိခြင်း ဖြစ်သည်။

တရားထိုင်သည်မှာ ရင်ထဲ၌ ပေါ်လာသော သဘောများအား ရှုသတ်ခြင်းပင် ဖြစ်ပါသည်။ ထိုသို့ ရှုသတ် လျှင်မူ မရှုသတ်သူများ မတွေ့ဖူးသေးသော အတွေ့အကြုံများကို တွေ့ရှိတတ်သည်မှာ ဓမ္မတာ ဖြစ်ပါသည်။ မိမိသည် တရားအတွက် စွန့်စွန့်စားစား အားထုတ်ခဲ့ဖူးသည်။ ထို့ကြောင့် ထိုက်တန်သော ဆုလာဒ်များလည်း ရခဲ့ဖူးသည်။ ဤဆုလာဒ်များကို အတွေ့အကြုံများ မျှဝေခံစားလိုသော သဘောဖြင့် မိမိစာဖတ်ပရိတ်သတ် အား အခါအားလျော်စွာ တင်ပြလေ့ရှိသည်။

တရားအားထုတ်ခြင်းသည် ကောင်းသော အလုပ်ဖြစ်သည်။ ရင်ထဲ၌ မတရားပေါ်သည်များကို ရှုသတ်၍ သန့်ရှင်းစေသည်။ သန့်ရှင်းဖန်များသောအခါ အကြည်ဓာတ်ရ၍ အကြည်ဓာတ် တောက်ပလာသောအခါ အမြင်ဓာတ်များလည်း ရနိုင်ပါသည်။ သို့သော် စာရေးသူသည် အမြင်ကို လိုက်သည်တော့ မဟုတ်ချေ။

အမြင်ဆိုသည်နှင့် ပတ်သက်၍ အခါအားလျော်စွာ သိစေသည်ဟု ယူဆရမည်ကဲ့သို့ ဖြစ်သည်။ ဤစကားလုံး လေးကို လေးလေးနက်နက် သုံးနှုန်းလိုက်ခြင်း ဖြစ်သည်။ မိမိတရားထိုင် သောအခါ  တစ်စုံတစ်ရာ သိလာသည်၊ သိစေသည်။ သိစေခြင်းအား ပြန်လည် ခွဲခြမ်းစိတ်ဖြာသောအခါ ပတ်ဝန်းကျင်၏ သက်ရောက်မှုကြောင့် သိလိုက်ရသည်လား ဟူသော သဘောရှိသည်။

မည်သူမဆို စိတ္တာနုပဿနာကို အားထုတ်သောအခါ မိမိ၏ အသေးစိတ် အတွင်းကျကျ စိတ်များအား သိသိလာသည်။ အကယ်၍ အပြင်ဖက်က လှိုင်းရှိလျှင် လှိုင်းရှိကြောင်းကိုလည်း သမာဓိကောင်းလျှင် သိနိုင်ပါ သည်။ အပြင်လှိုင်းနှင့် အတွင်းလှိုင်း မတူချေ။

မြတ်စွာဘုရားသခင် ကိုယ်တော်မြတ်ကြီးသည် ဗောဓိပင်နှင့် ရွှေပလ္လင်ကို အောင်မြင်တော်မူသည်။ ထိုနေရာ သည် အောင်ဓာတ်ရှိသည်။ မြတ်စွာဘုရား အလောင်းတော် တိုင်းလိုလို အားလုံးသော ဘုရားများသည် ထို နေရာ၌သာလျှင် မြတ်စွာဘုရားအဖြစ် ပွင့်တော်မူရမည် ဆိုသော အဟောရှိသည်။ ဤကိစ္စကို စောကြော ကြည့်ရာ အပွင့်ဓာတ် လှိုင်းဂယက် အင်းအား ကောင်းလွန်းသောကြောင့် ထိုနေရာ၌ မြတ်စွာဘုရား အလောင်းတော်များ ဘုရားအဖြစ် ပွင့်ကြခြင်း ဖြစ်ပေလိမ့်မည်ဟု မှန်းဆမိလေသည်။

ထို့ကြောင့် ပတ်ဝန်းကျင် လှိုင်းဂယက် ဆိုသည်မှာ ဤလောက၌ ရှိသည်။ လှိုင်းကောင်းလျှင် ကောင်းသကဲ့သို့ ခံစားတတ်ရာတွင် လှိုင်းဆိုးလျှင် ဆိုးသကဲ့သို့ ၌ တုန်ခါတတ်လေသည်။ ဤသဘောသည် ပြင်ပလှိုင်းနှင့် တွေ့ထိသောအခါ ဖြစ်တတ်သော ခံစားချက် အသိတရားများ ဖြစ်သည်။

စာရေးသူသည် လှိုင်းအမျိုးမျိုးကို ခံစားဖြတ်သန်းပြီး၍ ကျော်ဖြတ်ခဲ့သည် ဖြစ်ရာ ထိုလှိုင်းများကို ငြိမ်အောင် ရှုနိုင်သော အစွမ်းသတ္တိ ရှိသောအခါ သမာဓိရသည်။ ထိုသမာဓိသည် တည်ငြိမ်သဖြင့် အရာရာကို အကြောင်း အကျိုး မြော်မြင်ဆင်ခြင်တုံတရား သုံးသပ်သောအခါ အထောက်အပံ့ ပြုကြောင်း မိမိသည် သမာဓိကို ချီးကျူးရင်း ရေးသားခဲ့ဖူးလေသည်။

ယခုအခါလည်း မိမိ၏ သမာဓိမှာ အထိုက်အလျှောက် တည်ငြိမ်သည် ဖြစ်၍ အကျိုးအကြောင်း အဆိုး အကောင်းကို ၀င်စားနိုင်လေသည်။ မိမိသည် ပုဂံဘုရားများ၌ ဆက်လက်၍ တရားထိုင်ဦးမည် ဆိုသောဆန္ဒသည် တစ်ဖွားဖွား ပေါ်လျှက်ရှိရာ များမကြာမီ အခြားဘုရားများ၌ တွေ့ကြုံရသော ဖြစ်ရပ်များကိုလည်း ဆက်လက် ရေးသားနေမိမည်မှာ မြေကြီးလက်ခတ်မလွဲ ဖြစ်တော့သည်။

 

ဗုဒ္ဓစာပေဆုရ

ဒေါက်တာချစ်ငယ်(ဒဿန)

မြန်မာနိုင်ငံ

This entry was posted in Buddhism and tagged , , , . Bookmark the permalink.

Leave a Reply

Your email address will not be published. Required fields are marked *