ပျံ့မွှန်းမွှေးလှိုင်ကြူ -29

Share

ကိလေသာ ကုန်ခန်းခြင်း

ကိလေသာ ကုန်ခန်းစေသော ကျင့်စဉ်မှာ နည်းပညာဖြစ်သည်။ နည်းပညာ ဆိုသည်မှာ အဘယ်နည်း။ ပေါ်လာသမျှ စိတ်တို့ကို ဉာဏ်ဖြင့် အပျက်ရှုသတ်ရသော နည်းပင်ဖြစ်သည်။

ထိုသို့ အပျက်ရှုသောအခါ မည်သည့် အကျိုးထူးများ ရရှိနိုင်ပြီးနောက် ကိလေသာများ ကုန်ခန်းပြီး ဖြစ်နိုင်ပါသနည်း။

ရှေးဦးစွာ ပေါ်စိတ်ကို အနိစ္စ ရှုသတ်သဖြင့် ရှုသောဉာဏ်သည် အင်အားကောင်းလာခြင်း အရှုခံ အပယ်ခံ အသတ်ခံ စိတ်တို့သည် ကိလေသာလျော့ပါးခြင်း တည်းဟူသော ကျေးဇူးဖြစ်ထွန်းမှုများ စတင်ရရှိလာပါသည်။

ထိုအချင်းအရာသည် အဘယ့်ကြောင့်ပါနည်း။ ထိုမှ မည်သို့ အရဟတ္တ မဂ်ဉာဏ်ဖိုလ်ဉာဏ်ပိုင်ရှင် ဖြစ်လာရသနည်း။

ရှုလျှင် ရှုဉာဏ်မှာ ရင့်ကျက်လာသည်နှင့်အမျှ အရှုခံစိတ်များ ကိလေသာ လျော့ပါးလာရခြင်းမှာ ဓမ္မတာ သဘာဝ တရားကြောင့်ပင်ဖြစ်ပါသည်။

ထိုမှ တဆင့် ဉာဏ်ပညာ ရင့်သည်ထက် ရင်ကျက်လျက် နောက်ဆုံးစိတ်များသည် ကိလေသာ ကုန်ဆုံးလျက်လည်းကောင်း၊ ရှုဉာဏ်သည် အရဟတ္တ မဂ်ဉာဏ်အဖြစ်သို့ လည်းကောင်း၊ အသီးသီး ဖြစ်ထွန်းရရှိလျက် သွားပါသည်။

ကိလေသာ ကုန်ဆုံးသောအခါ ကိလေသာတို့ကို ကုန်ဆုံးချုပ်ငြိမ်းအောင် ရှုသတ်နိုင်သော ဉာဏ်ပညာဖြင့် အရဟတ္တ မဂ်ဉာဏ်ဖိုလ်ဉာဏ်တို့ကို ပိုင်ဆိုင်သွားရခြင်း ဖြစ်ပါသည်။

အရဟတ္တ မဂ်ဉာဏ်ဖိုလ်ဉာဏ် ရရှိပိုင်ဆိုင်ပြီးသွားပါလျှင် ခန္ဓာအပေါ် လော်လီခြင်းကင်းလျက် ဉာဏ်ပညာ ဦးစီးချက်ကြောင့် အပျက်တရား ဖက်မထားဘဲ မဂ်ဓားနှင့် ဖြတ်တောက်ပယ်စွန့်ကာ မြင့်ရာ မြတ်ရာ နိဗ္ဗူတာသို့ မှန်ကန်စွာ ဉာဏ်အရာဖြင့် ကောင်းစွာ မျက်မှောက် ၀င်စားရောက်သော် ကမောက်ကမ ဒုက္ခဖိစီး ခန္ဓာကြီးကို အပြီးအပိုင် ပယ်စွန့်နိုင်၍ မဆိုင်ရာမှန် ဘုံသုံးတန်မှ ဧကန်လွတ်မြောက် ခရီးရောက်သည် အံ့လောက်ဘွယ်ရာ ငြိမ်းငြိမ်းတည်း။

ဆက်လက်ဖော်ပြပါမည်

 

This entry was posted in Buddhism and tagged , , , , . Bookmark the permalink.

Leave a Reply

Your email address will not be published. Required fields are marked *