ဉာဏ်ပန်းမွှေးလှိုင်ကြူ -38

Share

အခန်း (၁၀)

သစ္စာဝါဒီ ပီသသူတို့အတွက် သတိပေးချက်များ

(ည) ခန္ဓာကိုယ် မြေကြီးသြဇာ မကျွေးရသေးမခြင်း

မြတ်စွာဘုရားသခင်ကိုယ်တော်မြတ်ကြီး လက်ထက်တော်၌ ရုပ်နာမ်ရှိသူတို့အား နိဗ္ဗာန်ချမ်းသာကို ရရှိ ခံစားထိုက်သူတို့အနေနှင့် နိဗ္ဗာန်ချမ်းသာသို့၎င်း၊ လူချမ်းသာ နတ်ချမ်းသာ ဗြဟ္မာချမ်းသာ ခံစားစံစားထိုက်သူ တို့အား လူချမ်းသာ နတ်ချမ်းသာ ဗြဟ္မာချမ်းသာသို့၎င်း၊ အသီးသီး ဝေနေယျတို့၏ ပါရမီအလျောက် ထိုက်သင့်ရာ ကို ပို့ဆောင်ချီးမြှင့် ပေးသနားတော်မူခဲ့သည်။

မည်သူမဆို မြတ်ဗုဒ္ဓ၏ သစ္စာလေးပါး လက္ခဏာရေးသုံးပါး တရားတော်မြတ်ကို ကျင့်ကြံအားထုတ်ပါလျှင် မိမိတို့ ဉာဏ်စွမ်းရှိသရွေ့ ပါရမီ အထုံအလျောက် ကောင်းမြတ်ရာကို ခံစားစံစား ရမည်သာဖြစ်၏။ တရားဂုဏ်တော်ခြောက်ပါးလည်း အထင်အရှားရှိသည် မဟုတ်ပါလော။

အချိန်အခါမရွေး အကျိုးပေးနိုင်သည်ဖြစ်သဖြင့် ကပ်၍ဆောင်ထိုက်သော တရားတော်မြတ်ကို ပညာရှင် အသီးသီး တို့သည် ကြည်လင်ချမ်းမြေ့စွာ နှလုံးသွင်းနိုင်ကြသည်သာ ဖြစ်၏။ ပဋာစာရီတို့ကဲ့သို့ အပူမီးတို့ဖြင့် ပြင်းထန်စွာ လောင်မြိုက်ခြင်းခံရသော ရုပ်နာမ်ကို မီးပုံအဟုန်ထဲမှ ဆွဲယူကယ်တင်လိုက်သကဲ့သို့ အေးမြတ်ရာ မဂ်ရေဖြင့် ငြိမ်းသတ်နိုင်စွမ်းရှိခဲ့သည် မဟုတ်ပါလော။ ဤမျှ အေးငြိမ်းစေနိုင်စွမ်းသော မဂ်ရေစင်ကို မည်သူသည် သောက်သုံးမမှီဝဲဘဲ နေစိမ့်နိုင်ပါသနည်း။

ဤမျှ ငြိမ်းအေးစေနိုင်စွမ်းသော မဂ်ရေစင်ကို မည်သူသည် မသောက်သုံး မမှီဝဲဘဲ နေစိမ့်နိုင်ပါသနည်း။ ပူလောင်ချင် ပူလောင်ပါစေ၊ ဒုက္ခပင်လယ် ဝေချင်ဝေပါစေ၊ ဒုက္ခများကိုသာ ဖက်တွယ်၍ အပူမီးတို့၏ လောင်မြိုက်ဒဏ် ဟူသမျှတို့ကို သိမ်းကျုံးခံလျှက် မိုက်တွင်းနက်နေမည် ဆိုပါက မိမိသာလျှင် လူညံ့ဖြစ်ရတော့ မည် မဟုတ်ပါလော။ အပူမီးကို ငြိမ်းသတ်စေနိုင်သော လက်နက်ကောင်းများ ရှိပါလျှက်နှင့် ဤလက်နက်တို့ကို အသုံးမပြုဘဲ ဒုက္ခမီးနှင့်အတူ ပေကပ်၍ နေမည်ဆိုပါက မိမိတို့၏ တာဝန်သာ ဖြစ်ပါတော့မည်။

   ကိလေသာမီး ငြိမ်းသတ်နည်း တရားတော်မှာ အထင်အရှားရပ်တည် ထွန်းပြောင်နေသည်ဖြစ်၏။ သစ္စာဉာဏ်ပန်း ရနံ့တို့သည် ပွင့်လန်းလျှက် မွှေးလှိုင်ကြူနေပြီတကား။

ထို့ကြောင့် အပူမီးဟူသမျှ မြူမျှမကျန်ရအောင် ငြိမ်းသတ်နိုင်စွမ်းရှိသော တရားတော်မြတ်ကို ရုပ်နာမ်ခန္ဓာရှိသူတို့သည် ဤခန္ဓာကိုယ်ကြီး မြေကြီးသြဇာအဖြစ် မကျွေးရသေးမခြင်း ဇွဲသတ္တိကြီးမားစွာဖြင့် ကျင့်ကြံအားထုတ်ထိုက်သည်ဟု တိုက်တွန်းနေရခြင်း ဖြစ်ပါကြောင်း။

 

ဆက်လက်ဖော်ပြပါမည်

Admin (www.chitnge.com)

This entry was posted in Buddhism and tagged , , , , , . Bookmark the permalink.

Leave a Reply

Your email address will not be published. Required fields are marked *