ဉာဏ်ပန်းမွှေးလှိုင်ကြူ -36

Share

အခန်း (၁၀)

သစ္စာဝါဒီ ပီသသူတို့အတွက် သတိပေးချက်များ

(ဇ) ဒုက္ခတရားကို ရင်ဝယ်မပိုက်စကောင်း

မြတ်စွာဘုရားသခင်ကိုယ်တော်မြတ်ကြီးက ခပ်သိမ်းသော ဖြစ်ပေါ်လာသော ဒုက္ခတရားများသည် အမြဲမရှိပါဟု အောက်မေ့တော်မူခဲ့ပါသည်။ ထို့ကြောင့် ဒုက္ခကို မြဲသည်ဟု ရင်ဝယ်ပိုက် စွဲမှတ်မှားသော ပုဂ္ဂိုလ်တို့သည် ဟောတော်မူသော တရားတော်နှင့် မကိုက်ညီ မြတ်ဗုဒ္ဓက မမြဲပါဟု ဟောတော်မူပါလျှက်နှင့် မြဲနေပါသည်ဟု မှတ်ယူနေလျှင် ဘုရားမြတ်စွာအား ကန့်လန့်တိုက်ရာ ကျပါလိမ့်မည်။

ဒုက္ခတရားကို အမြဲရှိသည်ဟု မမှတ်ယူဘဲ အပျက်တရားဟု မှတ်ယူပါလျှင် အဆိုပါ ဒုက္ခတရားတို့သည် ကြီးရာမှ သေးသွားရသည်။ သေးငယ်ရာမှ ပပျောက်သွားရသည်။ ဒုက္ခတရားကို မြဲ၏။ ခိုင်၏။ ပိုင်၏။ ဆိုင်၏ဟု မှတ်ယူပါလျှင် အမှန်တရားနှင့် ဆန့်ကျင်ဘက် တိုက်ရာဖြစ်၍ မရှိသော ဒုက္ခတရားများကို ရှိအောင်လုပ်ရာကျမည်။

သေးငယ်သောဒုက္ခတရားကို ကြီးကျယ်အောင် လုပ်ရာကျမည်။ ဒုက္ခတရားဟူသည် မလွဲမသွေ ပျက်စီး ရသည်သာဖြစ်ကြောင်း မမှိတ်မသုန် ယုံယုံကြည်ကြည် ခံယူလျှက် ထိုဒုက္ခတောင်ကြီးကို အနိစ္စတည်းဟူသော မမြဲခြင်း လက်နက်နှင့် အခက်အခဲ ဟူသမျှတို့ကို ဇွဲသတ္တိနှင့် ဖြိုဖျက်တိုက်ခိုက်ပါ။ အောင်မြင်ခြင်းသည် ဤဒုက္ခ အဆုံး၌ မလွဲမသွေ တည်ရှိနေသည်သာ ဖြစ်ပါသည်။ ထို့ကြောင့် ဒုက္ခတရားကို ရင်ဝယ်မပိုက်ပါနှင့်ဟု သတိပေးရခြင်း ဖြစ်ပါကြောင်း။

ဤသို့ သတိပေးပါလျှက်နှင့် ဒုက္ခကို ရင်ဝယ်ပိုက်နေပါလျှင် ဒုက္ခ၀ဋ်မှ ကျွတ်စရာလမ်း မမြင်တော့ပါ။ ထို့ကြောင့် ဥပါဒါန်ကြောင့် ဥပါဒ်မရောက်စေလိုကြောင်း ထပ်လောင်းမှာကြားလိုက်ပါသည်။

မီးခဲတစ်ခဲကို ကိုင်မိသောအခါ ပူမှန်းသိသော်လည်း ဆက်လက်၍ ဆုပ်ကိုင်ထားလျှင် အပူပြင်းထန်၍ လောင်ကျွမ်းမှုဒဏ် ခံရမည်မဟုတ်ပါလော။ မီးခဲကိုကိုင်မိ၍ ပူမှန်းသိလျှင် လွှတ်ချနိုင်ရမည်။ ဒုက္ခကို ဒုက္ခမှန်း သိပါလျှက် ရင်ဝယ်ပိုက်နေလျှင် ဒုက္ခတရားသည် ပိုမိုကြီးထွားလာလိမ့်မည် မဟုတ်ပါလော။

အမှန်တရားလည်းဖြစ်သော မြတ်ဗုဒ္ဓကလည်း ဟောတော်မူခဲ့ပြီးဖြစ်သော မိမိလည်း အကျိုးရှိပြီး ဖြစ်သော ဒုက္ခတရားတို့၏ မမြဲခြင်းသဘောတို့ကို အဘယ်ကြောင့် မရှုသတ် မပိုင်းဖြတ်ဘဲ ငုံ့စုံပစ် ခံနေရပါမည်နည်း။ လိပ်သတ္တ၀ါနှင့် ဖားသတ္တ၀ါတို့အား ကုန်းပေါ်တွင် တစ်စုံတစ်ခုတို့နှင့် ထိတို့လိုက်ပါသော် အဘယ်ကဲ့သို့ ရှိကြပါသနည်း။

လိပ်သတ္တ၀ါသည် ခေါင်းမှအစ ခြေစုံလက်စုံကိုင်၍ ငုံ့စုံပစ်ခံလျှက် ရန်သူလက်ဝကွက် အပ်နှင်းလိုက်သည် မဟုတ်ပါလော။ ဖားသတ္တ၀ါမှာမူ ထို့ထိလိုက်သည်နှင့် တပြိုင်နက် ခုန်ပေါက်ပျံလွှား အလွတ်ကြိုးစားသည် မဟုတ်ပါလော။

လောကဓံနှင့် ရင်ဆိုင်ရသော် ငုံးစုံပစ်ခံရခြင်းသည် အသိဉာဏ် မရှင်ခြင်း၏ အထိမ်းအမှတ်ပင် ဖြစ်နေပေ၏။ အသိဉာဏ်ရှင်သူသည် ဤလောကဓံ၏ အနိစ္စတရားကို သိမြင်လျှက် ကျော်လွှားဖြတ်သန်း အောင်မြင်နိုင်သော နည်းနိသျှကောင်းများနှင့် လမ်းစဉ်အမှန်အကန်တို့ကို ရှာဖွေဆည်းပူး ကျင့်သုံးလိုက်နာရမည် မဟုတ်ပါလော။

 

ဆက်လက်ဖော်ပြပါမည်

Admin (www.chitnge.com)

 

This entry was posted in Buddhism and tagged , , , , . Bookmark the permalink.

Leave a Reply

Your email address will not be published. Required fields are marked *