ဉာဏ်ပန်းမွှေးလှိုင်ကြူ – 34

Share

အခန်း (၁၀)

သစ္စာဝါဒီ ပီသသူတို့အတွက် သတိပေးချက်များ

(စ) ဟုတ်ရာ မှန်ရာ အကျိုးရှိရာ

            တစ်စုံတစ်ခုကို လုပ်ဆောင်ရန် ရှိသောအခါ ဟုတ်၏လော အကျိုးရှိ၏လောဟု ဆန်းစစ်ရမည်။ ဟုတ်နေ မှန်နေ အကျိုးရှိနေပါက မည်သူ မည်ဝါ မည်သို့ပင် ထင်ကြ မြင်ကြ ပြောကြပါစေ ပြတ်ပြတ်သားသား လုပ်ဆောင်ရမည်သာတည်း။ ဟုတ်ရာ မှန်ရာ အကျိုးရှိရာဆိုသည်မှာ မည်ကဲ့သို့သော အချင်းအရာပါနည်း။

ရုပ်နာမ်တရားကလေးများသည် အပျက်တရားများ ဖြစ်ကြပါပေ၏ဟု ရှုသတ်နိုင်ခြင်းသည် ဟုတ်တိုင်းမှန်စွာ ရှုသတ်လုပ်ဆောင်သင့်သည်သာ မည်၏။

မှန်ရာဆိုသည်မှာ ရုပ်နာမ်သည် ဒုက္ခဖြစ်၏။ ရုပ်နာမ်ရှိနေ၍ ဒုက္ခရှိနေခြင်းဖြစ်သည်။ ရုပ်နာမ် ချုပ်ဆုံးမှသာလျှင် ဒုက္ခချုပ်ဆုံးမည်။ ရုပ်နာမ်သည် ဘယ်နည်း ဘယ်ပုံဖြစ်လျှင် ဒုက္ခကင်းလွတ်လိမ့်မည် ဟူ၍ မမျှော်လင့်ထိုက်ပေ။

ရုပ်နာမ်လုံးလုံး ချုပ်မှသာလျှင် ဒုက္ခလုံးလုံး ချုပ်နိုင်မည်။ ရုပ်နာမ်၌ ကိလေသာစွဲကပ်နေလျှင် ကိလေသာများ ကပ်ငြိနေသေးသမျှ ကာလပတ်လုံး ဒုက္ခသည် အရှိန်မသတ်နိုင်ဘဲ နည်းမျိုးစုံလှည့်၍ ခံနေရမည်သာဖြစ်သည်။

ရဟန္တာ သူတော်စင်များသည် ခန္ဓာ၏၀န် လွန်စွာလေးကြောင်း ဖွင့်ဖေါ်မိန့်မြွက် လေ့ရှိကြသည်။ ထို့ကြောင့် ခန္ဓာဝန်ချမည်ဖြစ်သောအခါ သူတော်စင်တို့အတွက် အောင်မြင်ချက် ပြီးပြည့်စုံပြီဟု နာယူမှတ်သား ရခြင်းဖြစ်သည်။ ရုပ်နာမ်သည် ဒုက္ခပင်ဖြစ်သည်မှာ တကယ့်အမှန်တရားပင်ဖြစ်ပါတော့သည်။

အကျိုးရှိရာဆိုသည်မှာ ရုပ်နာမ်အပေါ် ဉာဏ်ပညာဖြင့် ရှုသတ်နေခြင်းပင်ဖြစ်သည်။ အကျင့်သည် အကျိုးရှိသော အကျင့်ဖြစ်သည်။ ဤအကျင့်ဖြင့် ရုပ်နာမ်၌ ကပ်ငြိနေသော ကိလေသာများကို လျော့ပါးစေနိုင် သည်။ ကိလေသာ လျော့ပါးစေခြင်းသည် အကျိုးရှိရာကို လုပ်ဆောင်နေခြင်းပင်ဖြစ်သည်။

ရုပ်နာမ်တို့သည် ဖြစ်ပေါ်လာပြီးနောက် ပျက်စီးရသည်သာတည်း။ ရုပ်နာမ်၏ အပျက်တရားကို ရှုမြင်နိုင်သောအခါ ထိုရုပ်နာမ်အပေါ်၌ သမုဒယ ကပ်ငြိမှု လျော့နည်းစေပြီး သမုဒယအင်အား လျော့နည်းလေလေ ဒုက္ခအင်အား လျော့နည်းလေလေဖြစ်သည်။ ဤအကျင့်သည်သာ ဟုတ်ရာမှန်ရာ အကျိုးရှိရာကို လုပ်ဆောင် နေသော အကျင့်ဖြစ်သည်။

ဟုတ်ရာမှန်ရာ အကျိုးရှိရာကို လုပ်ဆောင်သည် ဆိုရာ၌ ဇွဲသတ္တိရှိရန်မူ လိုအပ်ပေသည်။ မဟုတ်မမှန်ရာ အကျိုးယုတ်ရာကို လုပ်ဆောင်လိုသည့် ပုဂ္ဂိုလ်များနှင့် လည်း ဆန့်ကျင်ဘက် ဖြစ်နေတတ်သောကြောင့် မိမိ၏ အမှန်တရားကို ဟုတ်တိုင်းမှန်စွာ ဖေါ်ထုတ်နိုင်ရန် ရဲဝံ့ပြတ်သားခြင်း၊ ဇွဲသတ္တိရှိခြင်းများ မရှောင်မလွဲနိုင်အောင် လိုအပ်နေသည်သာ ဖြစ်ပါတော့သတည်း။

ဆက်လက်ဖော်ပြပါမည်

Admin (www.chitnge.com)

This entry was posted in Buddhism and tagged , , . Bookmark the permalink.

Leave a Reply

Your email address will not be published. Required fields are marked *