ဉာဏ်ပန်းမွှေးလှိုင်ကြူ – 33

Share

အခန်း (၁၀)

သစ္စာဝါဒီ ပီသသူတို့အတွက် သတိပေးချက်များ

(င) ခြိုးခြံခြင်းဆိုင်ရာ ကောက်ချက်များ

ခြိုးခြံခြင်း အမျိုးမျိုးတို့တွင် အအိပ်အနေ ခြိုးခြံခြင်းသည် သူတော်စင်တို့ အားခဲတိုက်တွန်းကြသော  ခြိုးခြံခြင်း အမျိုးအစားပင်ဖြစ်သည်။ အိပ်ခြင်းသည် သေခြင်းပင်ဖြစ်သည်။ တသံသရာလုံးက အိပ်ခဲ့သော အချိန်ပေါင်းများပြီဟု မှတ်ယူရပေမည်။

  အိပ်စက်သော အချိန်များမှ ခိုးယူ၍ မိမိ၏ အမှားအမှန် ဝေဖန်ပိုင်းခြားနိုင်သော ဉာဏ်အမြော်အမြင် တိုးတက်သည်ထက် တိုးတက်အောင်ကြံဆရမည်သာ ဖြစ်သည်။ မိမိသည် သူတော်စင်တို့၌ ရှိအပ်သော အရည်အချင်းများကို ပိုင်ဆိုင်နိုင်ရန် ကြိုးစား မွေးမြူ လေ့ကျင့် တည်ဆောက်နေသည်ဖြစ်ရာ အဆိုပါ အရည်အချင်းများ ပြည့်စုံသည်ထက် ပြည့်စုံအောင် တိုးတက်စရာ နည်းလမ်းကို ကြံဆရန်အတွက် အချိန်လုံလုံလောက်လောက် ပေးနိုင်စွမ်း ရှိရမည်သာဖြစ်သည်။

ထို့ကြောင့် သာမန်ပုဂ္ဂိုလ်တို့ အိပ်စက်နားနေချိန်၌ အိပ်စက်ခြင်းကို ခြိုးခြံလျှက် ကိလေသာမာရ်ကို အပြီးအပိုင် အောင်ပွဲခံရေး၊ ပုဂ္ဂိုလ်တို့၏ စရိုက်အလျော့အတင်းများကို ယထာဘူတကျကျ သိနားလည်စေရေး၊ သာသနာတော် စည်ပင်သာယာရေးနှင့် အဓွန့်ရှည်ရေး တို့အတွက်အိပ်စက်ချိန်ကို ခြိုးခြံလျှက် အားကြိုးမာန်တက် ကြံဆတည်ထွင် နိုင်ရမည်ဖြစ်လေသည်။

ဟဒယကြည်လင် ဉာဏ်ကြည်လင် မောဟလျော့နည်းသည်ဖြစ်ရာ အရာရာကို လုပ်ဆောင်ရာ၌ စိတ်ကြည်ကြည် ဉာဏ်ကြည်ကြည်ထား၍ စိတ်ကောင်းနှလုံးကောင်းနှင့် ချမ်းချမ်းမြေ့မြေ့ လုပ်ဆောင်နိုင်ရမည် သာဖြစ်သည်။ မောဟသည် လောဘနှင့် ယှဉ်တွဲလျှက်ရှိရာ အစားအသောက်ဆိုင်ရာ လောဘကို လျော့နည်းပယ်သတ်စေနိုင်လျှင်သော်၎င်း။ အစားအသောက် မှီဝဲရာ၌ လက္ခဏာရေး သုံးပါးဖြင့် ဆင်ခြင်နိုင်လျှင် သော်၎င်း၊ မောဟသည် ပိုမိုလျော့နည်း လာရမည်သာဖြစ်သည်။

အိပ်ချိန်ခြိုးခြံမှုနှင့် ပတ်သက်၍ တရားဓမ္မ ကျင့်ကြံကြိုးစားခြင်း ဆွေးနွေးညှိနှိုင်း တိုင်ပင်ခြင်း သာသနာအကျိုး သတ္တ၀ါအကျိုးကို မျှော်ကိုး၍ ကြံဆခြင်းတို့ကြောင့် အိပ်ချိန်လျော့နည်းရခြင်းတို့သည် ပွဲလမ်း သဘင်ကြည့်ရှုခြင်း ပျော်ပါးလည်ပတ်ခြင်းတို့ကြောင့် အိပ်ချိန်လျော့နည်းရခြင်းထက် ပိုမိုကြည်လင်၍ အပြစ်ကင်း ကြောင်း ကောင်းစွာသဘောပေါက်ပေသည်။

အခါအားလျော်စွာ တရားဓမ္မ ကျင့်ကြံအားထုတ်ခြင်း၊ သာသနာကိစ္စ ဆောင်ရွက်ခြင်းတို့ကြောင့် အအိပ်အနေ လျော့နည်းရခြင်းသည် ရုပ်နာမ်ခန္ဓာကို ထိခိုက် နစ်နာမှု မပေးနိုင်သော်လည်း ပွဲလမ်းသဘင် ကြည့်ရှုခြင်းကြောင့် အိပ်ရေးပျက်ပါလျှင် ရုပ်နာမ်ခန္ဓာထိခိုက်စေကြောင်း သူသူကိုယ်ကို သိရှိနားလည်ကြပြီး ဖြစ်ပါလိမ့်မည်။ ထို့ကြောင့် တရားဓမ္မဖြင့် အအိပ်အနေခြိုးခြံသောအကျင့်ကို အလေ့အကျင့် ပြုပေးအပ်သည်သာ ဖြစ်ပါကြောင်း။

 

 

ဆက်လက်ဖော်ပြပါမည်

Admin (www.chitnge.com)

This entry was posted in Buddhism and tagged , , . Bookmark the permalink.

Leave a Reply

Your email address will not be published. Required fields are marked *