ဝမ်းသာအပ်သည်ကို ၀မ်းသာရခြင်း

Share

ဝမ်းသာအပ်သည်ကို ၀မ်းသာရခြင်း

-lotus-2ရှင်သာရိပုတ္တရာကိုယ်တော်မြတ်ကြီးသည် ဥာဏ်တက်လျှင် တက်ကြောင်း သိအပ်၏၊ ဥာဏ်မှိန်လျှင် မှိန်ကြောင်း သိအပ်၏ဟု အဆိုအဆုံးမ ရှိတော်မူခဲ့ဖူးသည်။ သစ္စာဝါဒီများ တရားတက်လျှင် တက်ကြောင်း သိရမည်။ ကိုယ်ကျင့်တာ မှန်လျှင် မှန်ကြောင်း သိရမည်၊ ရဲရင့်ရမည်။ မှန်သောအပေါ်မှာ ရဲရင့်ခြင်းသည် သတ္တိပင် ဖြစ်သည်။

မြတ်စွာဘုရားသည် ဟုတ်တိုင်းမှန်စွာ ကြွေးကြော်ခဲ့ဖူးသည်။ မြတ်စွာဘုရားသည် “အမြတ်ဆုံး၊ အအောင်မြင်ဆုံး” ဟု ကြွေးကြော်တော် မူခဲ့ဖူးသည်။

မိမိတို့လည်း မှန်သောကျင့်စဉ်ကို ကျင့်သည့်အခါ မှန်သော ကျင့်စဉ်ကို ကျင့်သည်ဟု ကြွေးကြော်ခွင့်ရှိသည်။ ရှုခြင်းသည် မှန်သော အကျင့်ပင် ဖြစ်သည်။ ယခု သစ္စာဝါများကျင့်နေသော အပျက်တရားသည် မှန်ကန်သော ကျင့်စဉ်ဖြစ်သည်။ မြတ်စွာဘုရားနှင့် ရဟန္တာကိုယ်တော်မြတ်ကြီးများ၊ သူတော်ကောင်းများ ဟောမိန့်တော်မူသော ကျင့်စဉ်ပင် ဖြစ်သည်။

ထို့ကြောင့် ကျင့်ပါ ပြတ်ပြတ်သားသား ကျင့်ပါ၊ ပို၍ပို၍ ကျင့်ပါ၊ ကျင့်ခြင်းကို ဂုဏ်ယူပါ။ ဂုဏ်ယူခြင်းဆိုသည်မှာ မာနရှိခြင်းမဟုတ် မှန်ကန်ခြင်းအပေါ်၌ ရဲရင့်ခြင်း ဖြစ်သည်။ အချို့က အဓိပ္ပာယ်အကောက်လွဲနေကြသည်။ မှန်ကန်ခြင်းအပေါ် မရဲရင့်ရဟု ယူဆကြသည်။ ထိုသို့မဟုတ်ပါ။ နိဝါတတရား ရှိသည်မှာ မှန်သော်လည်း မှန်ကန်ခြင်းအပေါ်၌ ရရဲရင့်ဖို့ လိုသောအခါ ရဲရင့်ရမည်သာ ဖြစ်သည်။

အဓိကမှာ သူတော်ကောင်းများ အဆိုအဆုံးမအတိုင်း ဟုတ်သည်၊ မှန်သည်၊ ထို့နောက် အကျိုးရှိသည်ဆိုလျှင် ဆောင်ရွက် လုပ်ကိုင် ကြွေးကြော်ရမည်သာ ဖြစ်သည်။ ယောဂီများသည် ယခု မှန်နေသည်။ ထို့ကြောင့် မှန်သည်ကို မှန်သည့်အတိုင်း ကြွေးကြော်နိုင်သည်၊ ကျင့်သုံးနိုင်သည်၊ ဆောက်တည်နိုင်သည်၊ ရဲရင့်နိုင်သည်၊ သတ္တိရှိနိုင်သည်၊ ယုံကြည်နိုင်သည်။

ဤနည်းဖြင့် မိမိ၏ တရားဥာဏ်ရည်လည်း ပိုမို၍ တက်လာလိမ့်မည်။ ယခုကို ထူးထူးကဲကဲ တက်နေသည်၊ ဒီထက်ဒီ တက်ဦးမည်သာ ဖြစ်ကြောင်း သတင်းကောင်း ပေးအပ်ပါသည်။

ဗုဒ္ဓစာပေဆုရ

ဒေါက်တာချစ်ငယ်(ဒဿန)

This entry was posted in Buddhism and tagged , , , . Bookmark the permalink.

Leave a Reply

Your email address will not be published. Required fields are marked *