ဉာဏ်ပညာ၏လျှင်မြန်ပုံ

Share

ဉာဏ်ပညာ၏လျှင်မြန်ပုံ

ဆရာမြတ်ကြီးထံ အန္တေ၀ါသိက တပည့်အဖြစ် ခံယူခဲ့ရစဉ် ဉာဏ်ပညာ၏ လျှင်မြန်ပုံကို ဗဟုသုတ ရဖူးပါသည်။ ဉာဏ်ပညာသည် လွန်စွာမှမြန်သည်။ ရုပ်မြန်သည်ဆိုသည်မှာ စိတ်ကဲ့သို့ မမြန်နိုင်သကဲ့သို့၊ စိတ်မြန်သည် ဆိုသည်မှာ ဉာဏ်ကဲ့သို့ မမြန်နိုင်ပါ၊ ထိုသို့လျှင် သဘောရပါသည်။ ဉာဏ်ပညာသည် လွန်စွာမြန်သည်။ လျှင်မြန်သောဉာဏ်၊ ရှင်သန်သောသတ္တိ ဟူ၍ အဆိုအဆုံးမရှိသည်။

ဉာဏ်သည် လွန်စွာမှလျှင်မြန်လှလေရာ စိတ်တစ်ခဏများကို ရှုသတ်နိုင်စွမ်းရှိသည်မှာ ဉာဏ်ပညာပင်ဖြစ် သည်။ စိတ်သည် လျှင်မြန်သောဉာဏ်အောက်၌ အပျက်တရားအဖြစ် ထင်ရှားစေသည်။ ဉာဏ်မလျှင်မြန်လျှင် စိတ်သည် လွှမ်းမိုးသွားနိုင်သည်။ ရန်သူရှိသော အနှောင့်အယှက်ရှိသော အခါများတွင် ဥပမာဆိုပါစို့ ဉာဏ်ပညာ၏ လျှင်မြန်မှုသည် လွန်စွာတန်ဖိုးရှိသည်။ ရန်သူမဦးမီ ကိုယ်ဦးဖို့ အရေးကြီးသည်။ ထိုကိစ္စမှာ လျှင်မြန်သောဉာဏ်ရှိမှဖြစ်သည်။ ထို့ကြောင့် ဉာဏ်ပညာသည် နိုးကြားနေရသည်၊ တက်ကြွနေရသည်၊ လျှင်မြန် ရှင်သန်နေရခြင်းဖြစ်သည်။ နိုးကြားမှုကို တရားရှင်များက နှစ်ခြိုက်တော်မူလေ့ရှိသည်။

ဆရာမြတ်ကြီးသည် မိုးကုတ်ဆရာတော်ဘုရားကြီးထံ တပည့်ခံစဉ်က တစ်ခွန်း မိန့်လျှင် တစ်ခွန်း သတိယှဉ်နိုင်သည်။ အနား၌ ကျိန်းစက်ခွင့်ရသောအခါ တစ်ခွန်းမိန့်ရုံနှင့် ကြားသည်။ ထို့ကြောင့် မိုးကုတ်ဆရာတော်ဘုရားကြီးသည် ဆရာမြတ်ကြီးကို တပည့်ရင်းအဖြစ်ထားကာ အတူနေခွင့် ပြုတော်မူခဲ့ခြင်းဖြစ်သည်။ အအိပ်အနေ မစက်သောပုဂ္ဂိုလ်များအား မိုးကုတ်ဆရာတော်ဘုရားကြီးသည် မိမိအခန်းထဲ၌ မသိပ်ချေ။ ဆရာမြတ်ကြီးသည်သာလျှင် အအိပ်အနေ ပေါ့ပါး၊ ဖြတ်လပ်၊ နိုးကြားလွယ်သောကြောင့် မိုးကုတ်ဆရာတော်ဘုရားကြီးက အနီးတစ်ဝိုက်တွင် ထားတော်မူခဲ့ခြင်းဖြစ်သည်။

ဆရာမြတ်ကြီးသည် မိုးကုတ်ဆရာတော်ဘုရားကြီးထံတွင် သာသနာ့ဘောင်၌လည်း ၀င်ခဲ့သည်။ ထို့နောက် တဖန် ကျင့်ကြံအားထုတ်ရန်လိုသဖြင့် မိုးကုတ်ဆရာတော်ဘုရားကြီးက ခွင့်ပြုသောကြောင့် လူဝတ်ကြောင် လဲကာ အားထုတ်ခဲ့ဖူးသည်။ မိုးကုတ်ဆရာတော်ဘုရားကြီးက သဘောတူညီမှု ပေးတော်မူ၍ ဆရာသည် တောတောင်၊ ရေမြေ၊ သမုဒ္ဒရာ၊ သင်္ချိုင်းများ၌ တရားအားထုတ်ခဲ့ခြင်းဖြစ်သည်။ ထိုသို့အားထုတ်သဖြင့် လျှင်မြန်သောဉာဏ် ရရှိတော်မူခဲ့ဖူးသည်။ ၏ဉာဏ်သည် လွန်စွာမှ လျှင်မြန်သည်။ အနှောင့်အယှက်များကို တွေ့လျှင်လည်း ဆရာမြတ်ကြီးသည် အနှောင့်၏ ခေါင်းဆောင်ကိုတွေ့လေ့ရှိသည်။

စာရေးသူတို့သည် ဆရာမြတ်ကြီးထံ တပည့်ခံသောအခါ အကယ်၍ အနှောင့်အယှက်များကိုတွေ့လျှင် လက်ပါးစေ အစွန်အဖြားများကိုသာ တွေ့လေ့ရှိသည်။ ဆရာမြတ်ကြီးသည် အဓိကကျသော အနှောင့်ကို တွေ့တော်မူလေ့ရှိသည်။ ဤကား ထူးခြားသော ဆရာမြတ်ကြီး၏ ဉာဏ်ပညာ နက်ရှိုင်းပုံတို့၏ သက်သေ သာဓကပင်ဖြစ်သည်။

အနှောင့်အယှက်ရှိလျှင် ခေါင်းဆောင်ကို ဖြိုနိုင်မှသာ အောင်မြင်နိုင်သည်။ ဓမ္မအန္တရာယ်ဆိုသည်မှာ ရှိသည်။ သူတို့သည် မာန်နတ်အမျိုးအနွယ်များကဲ့သို့ ကောင်းသော အကျင့်ရှိသော ပုဂ္ဂိုလ်များအား ကောင်းသထက် ကောင်းမည်ကို စိုးရိမ်သဖြင့် နှောင့်ယှက်လေ့ရှိကြသည်။ ယင်းကား ဓမ္မတာသဘာဝပင်ဖြစ်သည်။ ထိုအခါ ဆရာမြတ်ကြီးသည် အဓိကကျသော အနှောင့်အယှက်၏ ခေါင်းဆောင်ကို တွေ့မြင်လေ့ရှိသည်။

စာရေးသူတို့သည် ဆရာမြတ်ကြီးထံ တရားအားထုတ်စဉ်က ထိုအကြောင်းအရာများအား လက်တွေ့ ဖြတ်သန်း ကြုံကြိုက်ခဲ့ဖူးသည်။ ထို့ကြောင့် စာရေးသူတို့သည် အနည်းနှင့်အများဆိုသလို လျှင်မြန်သောဉာဏ်ကို အမွေရ ခံယူနိုင်ခဲ့သည်။ ယခုအခါ မိမိကိုယ်တိုင်ပင် လျှင်မြန်သောဉာဏ်ကို အထိုက်အလျှောက် ပိုင်ဆိုင်နေသည်။

ဉာဏ်သည် လျှင်မြန်မှဖြစ်မည်။ ထိုင်းမှိုင်းခြင်း၊ လေးလံခြင်းသည် မလိုလားအပ်ချေ။ နိုးကြာတက်ကြွမှု၊ ရှင်သန်မှု၊ လျှင်မြန်မှုတို့ကို ဉာဏ်ပညာအရာ၌ အထူးအလေးပေးအပ်ကြောင်း ဆရာမြတ်ကြီး၏ အဆိုအဆုံးမ၌ ခံယူတည်ရှိခဲ့ရသည်။ ဆရာမြတ်ကြီး၏ အဆိုအဆုံးမများထဲတွင် ဗဟုသုတ မြောက်များစွာရှိရာ ပုဂ္ဂိုလ်တစ်ဦး တရားရနိုင်ဖို့အတွက် ကြီးစွာသော အထောက်အပံ့ကိုပြုကြောင်း လက်တွေ့ ခံယူနာခံ ခဲ့ရဖူးသည်။ ဤအကြောင်းများကို အခါအားလျှော်စွာ ရေးသားဖော်ပြ တင်ပြပါဦးမည်။

ဗုဒ္ဓစာပေဆုရ

ဒေါက်တာချစ်ငယ်(ဒဿန)

မြန်မာနိုင်ငံ

 

This entry was posted in Buddhism and tagged , , , . Bookmark the permalink.

Leave a Reply

Your email address will not be published. Required fields are marked *