မြတ်ပန်းမွှေးလှိုင်ကြူ -35

Share

မြတ်ပန်းမွှေးလှိုင်ကြူ

 

လမ်းညွှန်ချက်    

(၁) သုခအတုကို သုခအစစ် မဟုတ်သဖြင့် ဒုက္ခဟုသာယူပါ။

(ထိုအခါမှ ရာနှုန်းပြည့်သော သုခကို ရနိုင်မည်)

(၂) ထိုသုခ အတုသည် ပျက်နေသည်။ ပျက်နေခြင်းကို ဟန့်တား၍မရ။ အနှစ်သာရ လိုက်ရှာသော် ပျက်နေသဖြင့် မပိုင်ဆိုင်အပ်ကြောင်းသာ ထပ်လောင်း၍ အသိဉာဏ်ထဲ၌ ဖြစ်ပေါ်လာသည်။

ထိုအခါ ပထမ သုခ၏ အပျက်ကို သိမြင် ထိုးထွင်းလိုက်သောဉာဏ် ပညာအမြော်အမြင် ဆင်ခြင်မှု စွမ်းပကားသည် သုခအစစ်ကို တည်ဆောက်ဖွဲ့စည်း ဖြစ်ပေါ်စေသော အဓိက လိုရင်း အနှစ်သာရ စွမ်းအင်ပင် ဖြစ်သည်။ ဤစွမ်းအင် ကြီးမားစေခြင်းသည် မဂ်ဉာဏ်အင်အား ဖြစ်ပေါ်တိုးပွားလာစေရန် ကြိုးစားတည်ဆောက် နေခြင်းပင်ဖြစ်တော့သည်။

ဤကျင့်စဉ်သည် ကျင့်ထိုက်ကြံထိုက် မြတ်နိုးထိုက်သော ကျင့်စဉ်မည်သည် မှီခိုထိုက် လဲလျှောင်းထိုက် သော မြတ်သောကျင့်စဉ် မည်သည်။ တနည်း ချမ်းသာစစ် ချမ်းသာမှန်ကို ပေးစွမ်းသော မြတ်သော အကျင့်ပေ တည်း။

အခြားတစ်နည်း

ရုပ်နာမ်ကို ဒုက္ခတရားဘဲဟု ဉာဏ်နှင့်သိလိုက်။

ဒီအခါမှာ အသိဟာဉာဏ် ဉာဏ်ဟာအသိဖြစ်ပြီး အသိဟာ ဉာဏ်မှာကပ်သွားသည်။

ဉာဏ်အသိသည် ဒုက္ခမှ ကွာသွားသည်။ ဉာဏ်ဟာ ဒုက္ခအပေါ်မှာ သုံးသပ်နေသဖြင့် ဒုက္ခရုပ်နာမ်က တခြား သုံးသပ်သိရှိ နားလည်နေသော ဉာဏ်ကတခြား။

အသိကို ဉာဏ်မှာထားလျှင် ဒုက္ခမှ ဤနည်းဖြင့်လွတ်သည်။

ရုပ်နာမ်ကို ငါမှာ ထားလျှင် ငါဒုက္ခဖြစ်မည်။

ရုပ်နာမ်ရော ငါရော ဒုက္ခဖြစ်ကြသည်။

ဒုက္ခသည် အပျက်တရားဘဲ အပျက်မြင်အောင် ကျင့်ခြင်းသည် မဂ္ဂင်အကျင့်ပင်ဖြစ်သည်။ မဂ္ဂင်အကျင့်ကို ကျင့်ပါ။ မချမ်းသာဘဲ မနေပါဘူး။

 

 

တနည်း

ရုပ်နာမ်ကို မပိုင်မဆိုင်ပါ။

တကယ်လို့ ပိုင်ဆိုင်သည်ဟု ထင်လျှင်လည်း ထင်ကြည့်ပါ။ ဤအထင်မှားကြောင်း ရှင်းပြပါမည်။

ရုပ်နာမ်ဟာ မမြဲဘူး။ ဒါကိုတော့ ယုံကြည်တယ် မဟုတ်လား။ မမြဲလို့ နုရာမှ ရင့်ပြီး အို နာ သေ သွားကြရတာဘဲ။

ဒီတော့ ကောက်ချက်ချရမှာက ရုပ်နာမ်၏ ပျက်စီးခြင်းကို မပျက်စီးပါနှင့် လို့ တားမရဘူး။ ရုပ်နာမ်ရဲ့ အပျက်ကို ဟန့်တား လွှမ်းမိုး ထိန်းချုပ်လို့ မရဘူး။

ဒီတော့ ရုပ်နာမ်ကို ပိုင်သေးသလား။ သူ့ အပျက်ကိုတောင် ဟန့်လို့မရလျှင် သူ့ကို ပိုင်တယ်လို့ မှတ်ယူလို့ဖြစ်မလား။

မပိုင်လို့ဘဲ ပျက်စီးသွားရတာပေါ့။ ပျက်လို့ မပိုင်လျှင် မပိုင်တဲ့အရာနှင့် ဆိုင်သေးသလား။

မပိုင်လျှင် မဆိုင်ဘူးဟု ဥပေက္ခာပြုလိုက်ပါ။ လိုရင်းသုခစစ် ချမ်းသာအမှန်ကိုသိသော သဘောဉာဏ် ပေါ်လာပါလိမ့်မည်။

ဒါဟာ ရုပ်နာမ်အပေါ်မှာ လက္ခဏာရေး လက်တွေ့တင်တဲ့ ကျင့်စဉ်ဆိုင်ရာ သဘောတရား ပါဘဲ။ ဒီအတိုင်းနှလုံးသွင်းပြီး ဆင်ခြင်သုံးသပ် လက်တွေ့ကျင့်ကြံလျှင် ကျင့်ကြံအားထုတ်သူ မည်ပါမည်။ ဒီနည်းဟာ ကိလေသာ ဟူသမျှ မြူမျှမကြွင်းကျန်စေတဲ့ လက်တွေ့ကျင့်စဉ် လုပ်ငန်းခွင် တရားတော်ပါဘဲ။

ကိလေသာ ဟူသမျှ မြူမျှ မကြွင်းမကျန်ရေး တရားတော်ကို ဆင်ခြင်ပြီးနောက် ၅၂၈ သွယ် မေတ္တာကို ပို့သပြီး အမျှမေတ္တာ ပေးဝေလိုက်သည်။

ထို့နောက် အဓိက နောက်ဆုံးပန်းတိုင် ရည်မှန်းချက်ဖြစ်သော ရွှေစက်တော်ဘုရားအတွက် ခရီးဆက်ရန် ရည်သန်၍ နားနေကျိန်းစက်လိုက်သည်။

 

(စာပေခွင့်ပြုချက်အမှတ်-၁၁၀၃၂/၁၉၇၈-ခုနှစ်၊ ဇွန်လ)
ဆက်လက်ဖော်ပြပါမည် –
Admin (www.chitnge.com)

 

This entry was posted in Buddhism and tagged , , , , . Bookmark the permalink.

Leave a Reply

Your email address will not be published. Required fields are marked *