ဗုဒ္ဓဘာသာထဲကဘဝတစ်ခု 09

Share

ဗုဒ္ဓဘာသာထဲကဘဝတစ်ခု

အပိုင်း(၉)

တိုက်ပွဲဝင်ဝိပဿနာသမား

ယခုအခါ တိုက်ပွဲဝင်ဝိပဿနာသမား အကြောင်းကို ရေးသားချယ်မှုန်း နေပါသည်။ Stable (2)ဝိပဿနာသမား၏ ရန်သူဖြစ်သော အဝိဇ္ဇာနှင့် တဏှာကို တိုက်ခိုက်ပုံများအား တတ်နိုင်သမျှ အသေးစိပ် စီကုံးနှုန်းဖွဲ့ နေပါသည်။ ဤအခြေအနေ၌ ရုပ်နာမ်အား ဒုက္ခရန်သူဟု ခံယူထားရလေရာ ရုပ်နာမ်ချမ်းသာနှင့် လူ့အခွင့်အရေး ဆိုသည်များကိုတော့မူ ခေတ္တခဏ ဘေးချိပ်ထားရမည်ကဲ့သို့ ဖြစ်နေပါသည်။ စာရှုသူများကိုလည်း မေတ္တာရပ်ခံအပ်ပါသည်။

ယခုအခါ တိုက်ပွဲဝင်ဝိပဿနာ အကြောင်းကိုသာ စီကုံးနှုန်းဖွဲ့ရသည်ဖြစ်၍ မိမိ နှလုံးသား၌ဖြစ်စေ၊ ဟဒယ၌ဖြစ်စေ ကျူးကျော်ဝင်ရောက် လာမည်ဖြစ်သော အဝိဇ္ဇာနှင့်တဏှာကို တိုက်ခိုက်ချေမှုန်းရန် ပြင်ဆင်၊ ကြိုးစား၊ ရုန်းကန်၊ လှုပ်ရှားနေရသည့် အခိုက်အတန့် ဖြစ်သဖြင့် ဟဒယအပေါ်၌ဖြစ်စေ နှလုံးသားအပေါ်၌ဖြစ်စေ သက်ရောက်မည့် အဝိဇ္ဇာနှင့်တဏှာကို တိုက်ထုတ်ရန် ပြင်ဆင်နေသော အနေအထား၌ ရှိပါသည်။ ဤပြင်ဆင်မှုများ ပြီးဆုံး၍ အောင်မြင်သွားလျှင် တော့မူ၊ ခမ်းနားသိုက်မြိုက်လှသော နိဗ္ဗာန်ရောက်ကြောင်း တရားများအား ရေးသားမည်ဟု အနုမာန မျက်မှန်း ဆထားပါသည်။

ယခုအခါမူ တိုက်ခိုက်နေဆဲဖြစ်၍ နိဗ္ဗာန်ကို မော်မကြည့်နိုင်လောက်အောင် ဖြစ်ပါသေးသည်။ တိုက်ပွဲက အနုစိပ်လွန်းသဖြင့် လွန်စွာ သတိဝီရိယ ထားနေရသည်။ သတိထား၊ ဝီရိယစိုက်၊ ပညာဉာဏ်နှင့်ရှု ဟူသော မိန်မှာချက်အတိုင်း ကျင့်ကြံအားထုတ်နေရသော ကဏ္ဍဖြစ်ပါသည်။ သူတော်ကောင်းများက ဒေဝပုတ္တမာန်နှင့် ကိလေသာမာန်တို့သည် အရေးကြီးကြောင်း အထူး မိန့်ကြားတော် မူသည်ကိုနာခံ ခဲ့ပါသည်။

စာရေးသူသည် ဒေဝပုတ္တမာန်ကိုတော့မူ အခါအားလျော်စွာ မြင်တွေ့ခြင်း မရှိတတ်သဖြင့် အထူးမပြောလိုသော်လည်း ကိလေသာမာန်မှာမူ ရုပ်နာမ်ရှိနေ၍ မကြာခဏ ဝင်ရောက်ကျုးကျော် စီးပိုးတတ်သော သဘောဖြစ်သဖြင့် ယင်းကို အဓိကထား တိုက်ပွဲဝင်ခန်းများ ရေးသားနေပါသည်။

ဒေဝပုတ္တမာန်မှာလည်း သူတော်ကောင်းများ ဆိုဆုံးမသည့်အတိုင်း လွန်စွာတော့ အရေးကြီးပါသည်။ မိမိကို တွေဝေစေသည်၊ မှိုင်းတိုက်သည်၊ ထုံထိုင်းစေသည်၊ ထိုအခါ ငုံစုံပစ် ခံရတတ်သည်။ အဝိဇ္ဇာတဏှာသည် မိမိအား အလွယ်တကူလွှမ်းမိုး အပိုင်စီးသွားနိုင်သည်၊ ထို့ကြောင့် ဒေဝပုတ္တမာန်၏ စွမ်းဆောင်ချက်များကိုလည်း အတော်ဂရုစိုက်ရပါလိမ့်မည်။ စာရေးသူ အဖို့တော့မူ ဒေဝပုတ္တမာန်ကို အခါခပ်သိမ်း မြင်နိုင်စွမ်း မရှိပါ။ ထို့ကြောင့် အထူးတော့ မဝင်စားနိုင်ပါ။

ကိလေသာမာန်ကိုတော့မူ တိုက်ပွဲဝင်ဝိပဿနာသမားပီပီ အထူးသတိထား စောင့်ရှောက် ကာကွယ်ရသော အလေ့အကျင့်အကြောင်း ရေးသားစီကုံးပါသည်။ မိမိဟဒယ၌ဖြစ်စေ နှလုံးသား အပေါ်၌ဖြစ်စေ (နှလုံးသားဆိုသည်မှာ တင်စား၍ သုံးခြင်းဖ်ြစပါသည်။) မိမိအပေါ်၌ လွှမ်းမိုးလာနိုင်မည် ဖြစ်သော အဝိဇ္ဇာနှင့်တဏှာအား အထူးသတိထား၍ ဆင်ခြင်နေရပါသည်။ အထူးသတိထား ဆင်ခြင်သည့် ကြားမှပင် ထိုအဝိဇ္ဇာနှင့်တဏှာသည် အမှတ်တမဲ့ ရောက်လာတတ်သည်၊ အလစ်ရောက်လာတတ်သည်၊ ထိုအခါ ရုပ်နာမ်ဓမ္မမှာ သေဖွယ်ရန်သာ ရှိတော့သည်။  ဝိပဿနာ အားထုတ်ဖို့ ပြင်ဆင်ကြိုးစားနေချိန်တွင် သူတို့ကလာ၍  ကျူးကျော်စီးပိုး လွှမ်းမိုးသွားသောအခါ ဝိပဿနာသမားအဖို့ ခံစစ်သာလျှင် ရင်ဆိုင်ရနိုင်သည်။

ထို့ကြောင့် အထူးသတိထား ရသည်ဖြစ်ကြောင်း လက်တွေ့အတွေ့အကြုံကို အခြေခံ၍ ရေးသားနှုန်းဖွဲ့နေခြင်း ဖြစ်ပါသည်။ ဤအခန်းကဏ္ဍများ ပြီးလျှင် စာဖတ် ပရိသတ်များ နှစ်ခြိုက်လိမ့်မည် ဖြစ်သော နိဗ္ဗာန်ရောက်ကြောင်း နိဗ္ဗာန်စံကြောင်းများကို ရေးသားမည်ဟု မျှော်ကိုးထားပါသည်။ ယခုအခါ၌တော့မူ ဝိပဿနာ လက်တွေ့ကျင့်စဉ် လုပ်ငန်းခွင်၌ ဖြတ်သန်းရသော ဝိပဿနာသမား၏ တိုက်ပွဲဝင်ရ ပုံများအား တခန်းတနား အနုစိပ်၍ ဖော်ပြရန် ကြိုးစားလျှက် ရှိကြောင်း ဝန်ခံလိုပါသည်။

ဤတိုက်ပွဲသည် လွန်စွာမှ သတိရှိရသည်၊ အခါအားလျော်စွာ မိမိကိုယ်ကို မိမိကိုယ်တိုင် အကြံဉာဏ်ပေး ပညာရှိအဖြစ်နှင့်ခန့်၍ မိမိကိုယ်တိုင် ထိုအကြံဉာဏ်ပေး အကြောင်းအရာများကို ခံယူကာ ကျင့်သုံးရသော သဘောများလည်း ရှိပါသည်။ မိမိကိုယ်ကိုလည်း အကြိမ်ကြိမ် ဆုံးမရသော သဘောလည်းရှိသကဲ့သို့၊ အားမလို အားမရသဘောနှင့် ရန်သူအား အမှတ်တမဲ့ အငိုက်မိ၍ လက်ခံဝန်ခံလိုက်ရသော အဖြစ်များအကြောင်းကိုလည်း ရေးသားတင်ပြပါသည်။

ဤသို့ တင်ပြရာ၌ တိုက်ပွဲဝင်ဝိပဿနာသမားများ အထူးမလွယ်ကြောင်း အထူးအားပေး လိုကြောင်း၊ အထူးခက်ခဲ နက်နဲကြောင်းနှင့် အောင်မြင်သော အခါတော့မူ အတိုင်းထက်အလွန် ကျေးဇူးများလိမ့်မည် ဖြစ်ကြောင်းများကို သတင်းကောင်းအဖြစ် ဖော်ပြအပ်ပါသည်။

 

ဗုဒ္ဓစာပေဆုရ

ဒေါက်တာချစ်ငယ်(ဒဿန)

 

This entry was posted in Buddhism and tagged , , , . Bookmark the permalink.

Leave a Reply

Your email address will not be published. Required fields are marked *